Ako ti se jede nešto slatko, a ne želiš da provedeš pola dana u kuhinji, ove čokoladne kuglice s kikirikijem mogle bi da postanu jedan od tvojih omiljenih brzih deserata.
Za njih ti je potrebno svega sedam sastojaka, ne peku se i mogu biti gotove za manje od 10 minuta, uz još malo vremena za hlađenje.
Njegova najveća prednost je jednostavnost, piše Punkufer.hr. Potrebno je samo da sjediniš sastojke, dodaš komadiće čokolade, ohladiš smjesu i oblikuješ kuglice. 
Sastojci
Za približno 15 do 18 kuglica, zavisno od veličine, potrebno ti je:
120 g maslaca od kikirikija
120 g zobenih pahuljica
120 g meda
80 g tamne čokolade
2 kašike chia ili mljevenih lanenih sjemenki
1 kašičica ekstrakta vanilije
prstohvat soli
Ako želiš blaži ukus, možeš koristiti mliječnu čokoladu, ali će kombinacija s tamnom čokoladom dati izraženiji čokoladni ukus.
Kako se prave čokoladne kuglice s kikirikijem?
Najprije stavi zobene pahuljice u blender ili multipraktik i usitni ih dok ne dobiješ sitnu, gotovo brašnasto-krupičastu teksturu.
Dodaj chia ili mljevene lanene sjemenke, maslac od kikirikija, med, ekstrakt vanilije i prstohvat soli.
Sve dobro izmiksaj dok ne dobiješ ujednačenu i ljepljivu smjesu koja može da se oblikuje rukama.
Ako primijetiš da je smjesa previše mekana, dodaj još malo zobenih pahuljica. Ako je, s druge strane, presuva i teško se povezuje, dodaj malo maslaca od kikirikija.
Tamnu čokoladu sitno nasjeckaj, pa je umiješaj u pripremljenu smjesu. Nema potrebe da je topiš jer su upravo komadići čokolade ono što ovim kuglicama daje dodatnu teksturu.
Smjesu zatim stavi u frižider na oko 30 minuta. Hlađenje nije obavezno ako želiš odmah da ih oblikuješ, ali će nakon njega smjesa biti čvršća i lakša za oblikovanje.
Kada se ohladi, uzimaj po malo smjese i rukama oblikuj kuglice veličine oraha. Od navedene količine trebalo bi da dobiješ približno 15 do 18 kuglica.
Gotove kuglice možeš odmah poslužiti ili ih složiti u zatvorenu posudu i čuvati u frižideru.
Brz desert bez pečenja
Ove kuglice posebno su praktične tokom toplijih dana jer ne zahtijevaju pečenje ni bilo kakvu termičku obradu. Kombinacija kikirikija, meda, zobenih pahuljica i tamne čokolade daje im bogat ukus, dok chia ili lanene sjemenke dodaju zanimljivu teksturu.
Možeš ih poslužiti kao brz desert, užinu ili slatki zalogaj uz kafu, a najbolje od svega je što za njihovu pripremu ne moraš da uključuješ rernu.
Ako voliš deserte koji izgledaju kao da si se oko njih posebno potrudio, a zapravo su gotovi za svega nekoliko minuta, ove čokoladne kuglice s kikirikijem definitivno vrijedi isprobati.
