Ako ti je pohovano jedno od onih jela koje voliš bez obzira na dan, vjerujem da će ti ova posna verzija otvoriti nove horizonte. Lagana je, hrskava i daje bolji ukus od klasične mješavine jaja i prezli. Uz to, ne upija ulje, pa ostaje čistiji ukus povrća ili ribe.
Ovu smjesu čine samo gustin, kukuruzno brašno, kurkuma, so, prašak za pecivo i malo mineralne vode. Jednostavno, brzo i iznenađujuće dobro. Smjesa radi jednako dobro s tikvicama, patlidžanom, kuvanim povrćem, a uz malu izmjenu začina – i s ribom.
Sastojci:
150 g gustina
50 g kukuruznog brašna
1 kašičica kurkume
½ kašičice soli
½ kašičice praška za pecivo
100 ml mineralne vode
Za ribu: smanji kurkumu na pola kašičice i dodaj pola kašičice mljevene slatke paprike.
Uputstvo za pripremu:
Pomiješaj gustin, kukuruzno brašno, so, kurkumu i prašak za pecivo u jednoj činiji. U tu suhu smjesu najprije uvaljaj kuvano povrće koje želiš pohovati. Ako spremaš ribu, koristi mješavinu sa smanjenom kurkumom i dodatom paprikom.
U ostatak smjese dodaj mineralnu vodu i dobro razmuti da nema grudica. Trebalo bi da dobiješ masu malo gušću od tijesta za palačinke. Ponovo uvaljaj povrće ili ribu u tu tečnu smjesu.
U tiganj sipaj ulje, zagrij ga i prži na srednje jakoj temperaturi.
Zahvaljujući gustinu, pohovano neće upiti višak masnoće, a kurkuma daje prirodnu zlatnu boju, vrlo sličnu onoj koju dobijaš kad koristiš jaja i prezle, piše N1 Hrvatska.
