Znaš onaj osjećaj kad otvoriš teglu i miris te odmah podsjeti na dom? Upravo to je cvekla – skromna, ali moćna zvijezda svake zimnice, koju mnogi s pravom zovu zdravlje u tegli.
Prema portalu N1 Info, ovo povrće već vjekovima oduševljava ljude svojim nutritivnim bogatstvom. U 100 grama ima tek 43 kalorije, ali i obilje vitamina C, folne kiseline, kalijuma i mangana. Osim toga, cvekla je puna antioksidanasa betalaina, koji pomažu u borbi protiv oksidativnog stresa i čuvaju tijelo od hroničnih bolesti.
Cvekla podržava zdravlje srca, snižava krvni pritisak i poboljšava varenje zahvaljujući vlaknima. A ako ti nedostaje gvožđa – tu je da spasi stvar.
Osim što je zdrava, cvekla iz tegle je i neodoljivo ukusna, pa ne čudi što mnogi bez nje ne mogu da zamisle sezonu zimnice. Ali ako želiš unijeti malo svježine u tradiciju, probaj varijantu s mrkvom i paprikom.
Sastojci:
500 g mrkve, 700 g cvekle, 14 pečenih oljuštenih paprika, 120 ml ulja, 120 ml sirćeta, 60 g šećera, 4 kašičice soli, 6 čenova bijelog luka, konzervans, biber u zrnu (po želji), lovorov list.
Priprema:
Skuvaj mrkvu i cveklu, pa ih sitno isjeckaj. Isto uradi s paprikama i bijelim lukom. Sve pomiješaj, dodaj konzervans i na vrh stavi lovorov list.
Tegle steriliši, premaži ih sirćetom, dobro zatvori i odloži na tamno i suvo mjesto.
Ako više voliš klasiku, probaj cveklu za zimu bez konzervansa – samo sirće, šećer i začine po želji, pa pasterizacija.
Za bržu varijantu, tu je sirova cvekla: narendaj je, dodaj so, šećer, sirće i začine, prelij vrućim sirćetom i zatvori u sterilisane tegle.
Jednostavno, ukusno i – zdravo do srži. Jer kad jednom napraviš svoju cveklu, više nikad nećeš poželjeti kupovnu.
